Heb 9 | TPZ | STEP | O vatompoan vamomoaan to teß me non a ma taateß va pa kë a ëhnan e Sosoenën no teß ësës heß to nok manih koman a topa vasioß teßteß vah manih po oeh.

bEks 24:8

Hebrews 9

A Teß Susun Po Teß Ësës Heß Vamoaan To Ësës Voh Non O Vönaß

1 O vatompoan vamomoaan to teß me non a ma taateß va pa kë a ëhnan e Sosoenën no teß ësës heß to nok manih koman a topa vasioß teßteß vah manih po oeh. 2 A topa vasioß teßteß vah nee to eok, ka ö vëh mahën to teß non a ö toktok po vauß, me a pok, ka manih pa pok to teß non a taëën nee to heßheß ne na e Sosoenën. Ko teß ësës heß varoe to ënëën ne. 3 Ka manih tonun a ö vapenpen nee to vahan pip a ö vasioß teßteß pe Sosoenën po rara papanöß. 4 Manih pa tonun o rara pamëh to teß non a pok vapenpen nee to mon voh po vös gol, pare ësës ne a ma tah vavuh vih nën. Pareß teß non a pokis nee to mon po vös gol. A pokis pamëh to teß non a manaß to teß hop non pa nöh nee to nok pa gol, me o toknon pe Aron to veoh voh en, ^{▼▼Ep na po Puk Nampaß, 17:6-10 to sosoe non a ö no toknon pe Aron to veoh voh en.} me a poa ta vös to kiun non a havun soe vaënpan pe Sosoenën. 5 Tonun a pokis to teß non a poa ankeroß varih, a ëhnëëre o Sërupim to vëknöm ne a ö vasioß teßteß pe Sosoenën. Ka poa paknëëre vaßnaßtöön ne a ö nee to tatapui ne o eraß po vönaß va pa vahik a ma hat pa napan. Ivëhkëk kuru, na se hikta vahutët vörep suk no a ma tah poë varih.

6 Ivaßih, a ö no a ma tah to teß vavoh ne, a teß ësës heß se ho manuh pa ö vamahën pa nok a kiu peß. 7 Ivëhkëk, a Teß Susun po Teß Ësës Heß to se ho oah manuh pa koman a ö vasioß teßteß pe Sosoenën pa nok a kiu peß po pöh poen komön o pöh kirismas. Eß se teß ho o eraß po vönaß neß se heß na manuh pe Sosoenën, pa vahik a ma hat pa napan nee to hikta koman ne a nok, me a ma teß hat koman peß. 8 Ivëh, ka Tuvuh Vasioß vavaasis vamaaka en pea, pa ö no a ma tah varih to teß va ne manuh pa topa vasioß teßteß vah. Ka hanan va pa ho manih pa Ö Vasioß Oah to hikta taperet voh non pa ö no a topa vasioß teßteß vah vamomoaan to teß avoeß voh non. 9 A taateß va pa vaës o vönaß vamanih po heß to vataare a ra pan, eß to hikta onöt non a vavivihan o toßtoß po teß varih to kë ne a ëhnan e Sosoenën. 10 A ma taateß va pa pupui a ma tah varih, taëën, ruen vih kakaak, vapupui koren, me a taateß ësës vönaß, eße a ma tah va po sionin varoe to hikta onöt ne a vaßaus o toßtoß pea. Ivëhkëk, a ma tah poë varih to teß anoeh ro voh ne a ö ne Sosoenën se panih en pee manih po vatompoan voon.

11 Ivëhkëk, e Kristo to nö vavoh maß manih pa Teß Susun po Teß Ësës Heß, pareß panih en pa ma tah vamoaan to teß voh ne, eß to panih en pa taateß va pa ës o vönaß, me a heß a ma heß manuh pe Sosoenën. Manuh pa vöön va kin a iuun vasioß to teß apuh oah e non, pareß totoopin, no hikta teß to nok voh. A tah vih ivëh, e Kristo to mët ko sun hah, pareß nö nën pa nok a kiu pa Teß Susun po Teß Ësës Heß, pareß panih en po vatompoan vamoaan. 12 E Kristo to voen hah a ra po eraß peß, pareß heß a ra o toßtoß tamoaan. Pareß ho manuh pa iuun vasioß vöh pa vöön va kin po pöh poen ro. Ivëhkëk, eß hikta teß o eraß va po vönaß pa heß vamanih po heß. 13 O eraß pa meemeß, me a purmakaöß apuh, me o kukuvun in a purmakaöß sekaß nee to ës. Pare varapök manih pa napan varih to teß me ne a ma hat, ka ma hat teraß varoe pa napan to hik ee. Ivëhkëk, o eraß pe Kristo to kikis oah e non po eraß pa vönaß. O eraß pe Kristo to ihan anoe a ma hat teraß, me a ma teß hat kokoaan pa napan. 14 A tah vëh to tavus man en pa ö ne Kristo to vapuh en peß po eraß peß. A Tuvuh Vasioß to vaßaus poan manih pa ö neß to heß ea manuh pe Sosoenën vamanih po heß vih vivihan teßteß tamoaan. O eraß peß se pupui a ma kokoman vakoaan pea, ka koe a ma taateß hat moaan poë varih, se me en pea pa mët. Ivëh, ka se nonok no a kiu pe Sosoenën toßtoß tamoaan.

15 Ivëh, ke Kristo kiu non topnin o vatompoan voon po teß varih, ne Sosoenën to vaoe se kon a tapui teßteß tamoaan, neß to soe vaman voh. A tah vëh se tanok suk e Kristo to mët, marën a voen hah raoe, pareß vahik en pa ma hat pa napan to teß voh ne paan o vatompoan vamoaan. 16 A teß se keh kiun en pa soe vaonöt pa tah neß to vaneah non no a meh teß se kon, ahikta teß to onöt non a kon, keß öök non po poen ne tövaneah se mët. Po poen neß to maaka pan, e tövaneah to mët en, a meh teß to onöt e non pa kon a ma tah varih pa ö no a soe vaonöt to soe va non. 17 A soe vaonöt pamëh to hikta teß non ta tah pa ö no a teß to kiun a soe vaonöt to teß toßtoß non. A teß vëh no a soe vaonöt to vaonöt ke poan, eß se kon varoe pa ö no a teß pamëh to kiun a soe vaonöt to mët en. 18 Ivëh, ko vatompoan vamomoaan to teß vaeh koe voh non manih po eraß in o vönaß. 19 Vamomoaan ne Mosës to soe ke ra napan a ma taateß pe Sosoenën. Pareß kon o eraß pa meemeß me a purmakaöß sekaß, ko hovën pa ruen, pareß tai maß a popokoß naon, ko pöm po kuri, ko varu na pa nam eraß, pareß kon hah, ko rapis a napan vaßpeh me o puk vëh no a soe pe Sosoenën to kiun non. 20 Ke Mosës soe pan,

“Ivaßih, o eraß to vaeh non o vatompoan ne Sosoenën to heß voh a neöm,
nöm se vavatet nem.” ^b
21 Eß to nok pet va en nën manih pa iuun teßteß pe Sosoenën, me a ma moeh tah varih nee to kë ne a ëhnan e Sosoenën. 22 Manih po Vavaasis pe Mosës to soe non pan, a ma meh tah, me a ma hat pa napan na to pupui vavoon nö no po eraß po vönaß. Ivëh, ke Sosoenën hikta onöt non a ihan anoe a hat pa napan, pa ö no eraß se keh hikta takoß.

O Eraß Pe Kristo To Pupui Vavoon A Ra

23 Ivëh, ka ma tah kurus varih koman a topa vasioß pamëh, ^{▼▼[... a topa vasioß ...] Eß a ö ne Sosoenën to teßteß non.} nee se pupui vavoon po eraß po vönaß, to vëknöm ne a ma tah to teß ne pa vöön va kin. Ivëhkëk, a ma tah va pa vöön va kin to iu ne o eraß to teß vih oah rakah non. 24 Ivëh, ke Kristo to ho voh en pa vöön va kin pa iuun vapenpen pe Sosoenën, a iuun pamëh no a hikta teß to eok. Ivëh, keß teß ka no maß ra manuh pa vöön va kin vaßpeh me Sosoenën. 25 O Teß Susun po Teß Ësës Heß po Jiuß, to oho voh ne pa piprom vivihan vaßpeh me o eraß po vönaß, po pöh poen komön o pöh kirismas, pa ma kirismas kurus. Ivëhkëk, e Kristo to hikta heß vapeo o eraß peß. 26 Ivëh, ke Kristo hikta kon kamis vapeo voh, taneo non po poen ne Sosoenën to nok o oeh, keß öök non po poen vëh kuru. Eß to koaß voh maß manih po oeh, ko mët ko sun hah, pareß hikta se mët hah non. Ahik rakah. Eß to tavus manih po poen vëh kuru pa ö ne Sosoenën to vaeh o vatompoan voon. E Sosoenën to vaeh o vatompoan voon pa ö neß to vanö maß e Kristo, keß heß ea vamanih po heß to ihan anoe non a ma hat kurus pa napan. 27 Ea se mët a paeh mët ro, ko vasuksuk ne Sosoenën se kiiki a ma hat na to nok. 28 Ivëh, ke Kristo mët voh en, ko heß ea vamanih po heß va pa ihan anoe a ma hat pa napan kurus. Eß to hikta se vapöök mët hah non, suk a ma hat pa napan. Ivëhkëk, eß se hah en maß pa kon hah o teß varih to vamatop ko anoeh ne a hah peß.